Hərbi xidmətə çağırılan işçilərin hüquqları və maliyyə təminatı

Həqiqi hərbi xidmətə çağırılan işçilərin işəgötürən tərəfindən təminat hüquqları müəyyən edilib. İşçi hərbi xidmətə çağırıldıqda, Əmək Məcəlləsinin 74-cü maddəsinin “a” bəndinə əsasən əmək müqaviləsi xitamlandırılır. Belə hallarda işəgötürən, Əmək Məcəlləsinin 77-ci maddəsinə uyğun olaraq, işçiyə orta aylıq əməkhaqqının ən azı üç misli miqdarında müavinət ödəməlidir.

Dövlət Əmək Müfəttişliyi Xidmətinin rəisi Vəli Quliyev bunu “Dövlət Əmək Müfəttişliyi Xidmətinin 2025-ci il üzrə fəaliyyəti və 2026-cı il üçün hədəfləri” mövzusunda keçirilən mətbuat konfransında bildirib.

Quliyev əlavə edib ki, 16 yanvar 2026-cı ilədək, yəni Əmək Məcəlləsinə edilmiş dəyişikliklər Prezident İlham Əliyev tərəfindən təsdiqlənənədək, müavinətin məbləği orta aylıq əməkhaqqının iki misli həcmində müəyyən olunmuşdu.