Zəngəzur Dəhlizi ilə Bağlı Yeni Qərar

Ermənistan Xarici İşlər Nazirliyi “Tramp Marşrutu” adlandırılan layihə çərçivəsində Zəngəzur dəhlizi ilə bağlı işlərin nə vaxt başlanacağını açıqlayıb.

Nazirliyin yaydığı məlumata əsasən, dəhlizin icrasının real mərhələsi, o cümlədən tikinti prosesinin startı 2026-cı il üçün nəzərdə tutulur. Qeyd olunur ki, bu mərhələ layihənin faktiki həyata keçirilməsinin başlanğıcı olacaq.

Eyni zamanda bildirilib ki, Ermənistan və ABŞ-ın birgə iştirakı ilə yaradılan TRIPP şirkəti ölkə ərazisində qeydiyyata alınacaq. Şirkətə avtomobil yollarının, neft və qaz boru kəmərlərinin, eləcə də fiber-optik rabitə xətlərinin inşası və inkişafı daxil olmaqla zəruri infrastruktur layihələrinin icrası həvalə ediləcək.

Layihənin Transxəzər Beynəlxalq Nəqliyyat Marşrutu (TITR – “Orta Dəhliz”) və Körfəz–Qara Dəniz Beynəlxalq Nəqliyyat Dəhlizi kimi əsas regional nəqliyyat xətlərini birləşdirərək bölgədə əlaqələrin genişləndirilməsinə xidmət edəcəyi vurğulanır.