Mingəçevirdə söz və sənət bir araya gəldi

Mərkəzi Aran Regional Mədəniyyət İdarəsinin təşkilatçılığı ilə Mingəçevir şəhər şəhid Azər Niftəliyev adına Mədəniyyət Mərkəzində yaradıcı şəxslərin və kollektivlərin peşəkar inkişafını dəstəkləmək məqsədilə “Söz, sənət işığında” adlı görüş keçirilib.

Tədbiri Mədəniyyət Mərkəzinin direktoru vəzifəsini müvəqqəti icra edən Kəmalə Qurbanova açaraq yazarları salamlayıb və şəhidlərin xatirəsi bir dəqiqəlik sükutla yad edilib. Daha sonra o, sözü Mingəçevir yazarlarına verib.

Yazarlar adından çıxış edən şair-publisist Məmməd Mərzili, AYB-nin Mingəçevir bölməsinin sədri, tanınmış şair-publisist İsmayıl İmanzadənin salamlarını tədbir iştirakçılarına çatdırıb. O, görüşdə iştirak edən hüquqşünas-şair Bəhmən Gülövşəlini, şair Əhməd Əfsunu, şairə Minarə İsgəndərlini, MDU-nun magistrantı, şair Əfqan Dönməzi və özünü — şair-publisist, AJB üzvü Məmməd Mərzilini tədbir iştirakçılarına təqdim edib.

Şairlər qısa təqdimatlardan sonra Vətənə, Zəfərə və şəhidlərə həsr olunmuş şeirlərini səsləndiriblər. Müxtəlif janrlarda təqdim olunan poeziya nümunələri mədəniyyət işçiləri tərəfindən böyük maraq və alqışlarla qarşılanıb.

Mədəniyyət işçilərindən Mənzərə Rəhimova, Kəmalə Kərimova, Gülmira Bəşirova və digərləri də şairlərin misralarını səsləndirərək görüşə rəng qatıb. Tədbirdə Əliyusif Kazımov, Abbas Məmmədov, Natəvan Alxasova, Firdovsi Məsimov, Güldəstə Məmmədova, Aynur Aslanova, Sevda Təhməzova, İradə Bəkirova, Yeganə Məmmədova, Cavad Hüseynov, Söhrab Məmmədov və digər mədəniyyət işçiləri iştirak ediblər.

İştirakçılar yazarların yaradıcılığı barədə suallar verib, bu cür tədbirlərin mütəmadi keçirilməsinin vacibliyini bildiriblər. Yazarlar da öz növbəsində görüşdən məmnun qaldıqlarını deyərək, yeni çap olunmuş kitablarını mədəniyyət işçilərinə hədiyyə ediblər və tədbirin təşkilinə görə Mərkəzi Aran Regional Mədəniyyət İdarəsinə təşəkkür ediblər.

Sonda iştirakçılar və yazarlar xatirə şəkilləri çəkdiriblər.