Mingəçevir Dövlət Universiteti (MDU) Elsevier və Clarivate-in birgə elmmetriya proqramında təmsil olunub

Mingəçevir Dövlət Universiteti (MDU) Sənayenin təşkili və idarəetmə kafedrasının müəllimi Nurlan Əzizli, Elsevier və Clarivate şirkətlərinin tarixdə ilk dəfə birgə həyata keçirdiyi elmmetriya üzrə mütəxəssis hazırlığı proqramında iştirak edərək, universitetimizi uğurla təmsil edib.

Elm və Ali Təhsil üzrə Dövlət Agentliyinin dəstəyi ilə həyata keçirilən dörd aylıq hazırlıq proqramı, ölkədə “Scopus” və “Web of Science” kimi elmmetrik və bibliometrik bazaların ekspert səviyyəsində tətbiqini təmin edəcək mütəxəssislərin yetişdirilməsinə yönəlmişdir. Proqramda ölkə üzrə 150 müraciətçi arasından seçilən 70 iştirakçı arasından yalnız 28 nəfər proqramı uğurla tamamlayaraq, Elsevier və Clarivate şirkətlərinin birgə sertifikatına layiq görülüb.

Proqramın uğurla başa vuran mütəxəssisləri, elmi göstəricilərin daha dəqiq ölçülməsi, tədqiqatçılara ədəbiyyat axtarışlarında dəstək göstərmək və elmi işlərin dərci üçün yüksək keyfiyyətli jurnalların seçilməsinə töhfə vermək kimi əhəmiyyətli vəzifələri yerinə yetirəcəklər. Mingəçevir Dövlət Universitetinin bu sahədəki fəal iştirakı, universitetin elmi inkişafını daha da irəlilətmək məqsədilə beynəlxalq əməkdaşlıq çərçivəsində atdığı növbəti addım kimi dəyərləndirilir.