Mingəçevir Dövlət Universitetinin tələbələri “Poliqon”da hərbi vətənpərvərlik ruhunda təlim alıblar

11-13 oktyabr 2024-cü il tarixlərdə Mingəçevir Dövlət Universitetinin 50 nəfər tələbəsi “Poliqon” hərbi-vətənpərvərlik düşərgəsinə qatılıb. Düşərgənin bağlanış mərasimində Mingəçevir Dövlət Universitetinin rektor vəzifəsini müvəqqəti icra edən, tədris məsələləri üzrə prorektor Üzeyir Zeynalov iştirak edib.

Üzeyir Zeynalov bildirib ki, bu kimi təlimlər və tanışlıqlar tələbələrimizin vətənpərvər ruhda yetişməsi və tariximizin gerçəkləri ilə daha yaxından tanış olmaları baxımından vacibdir. Gənclər və İdman Nazirliyi tərəfindən təşkil olunan düşərgə, gənclərin hərbi-vətənpərvərlik ruhunda yetişməsi üçün vacib məkanlardan biri olaraq “Poliqon” adı altında həyata keçirilib. Universitetin tələbələri düşərgənin növbəti qonaqları olub.

Düşərgə çərçivəsində tələbələr bir çox fəaliyyətlərdə iştirak ediblər. Onlar intellektual yarış, sıra hazırlığı, mühəndis hazırlığı, mina təmizləmə, silahların sökülüb yığılması, airsoft atışları, tir atışı, dağçılıq, topoqrafiya və Şuşa əməliyyatının maket üzərində izahı kimi praktiki təlimlərə cəlb olunublar. Bununla yanaşı, müxtəlif idman yarışları və nümunəvi hazırlıqlar da düşərgənin proqramında yer alıb.

Düşərgədə təlimlər, Xüsusi təyinatlıların ehtiyatda olan hərbi qulluqçuları tərəfindən aparılıb. Tələbələr, eləcə də 2020-ci il Vətən müharibəsi zamanında erməni qəsbkarları tərəfindən atəşə tutulan Tərtər rayonunun hıssələrinin qalıqları ilə də tanış olublar.

Qeyd edək ki, düşərgə müdətində tələbələrimiz özəl fəallıqları və bacarıqları ilə fərqləniliblər. Tələbə gənclərin milli mənəvi dəyərlərimizə bağlı yetişdirilməsi rəhbərlik tərəfindən daim diqqətdə saxlanılır.