12–15 avqustda güclü maqnit fırtınaları gözlənilir – alimlərdən xəbərdarlıq

Alimlərin proqnozuna görə, 12–15 avqust tarixləri arasında Yer üzündə geomaqnit aktivliyi xeyli artacaq. Bu vəziyyət xüsusilə xroniki xəstəlikləri və sinir sistemi pozğunluqları olan insanlar üçün sağlamlıq problemləri yarada bilər.

Proqnozun təfərrüatları:

• 12 avqust: G1 səviyyəli maqnit fırtınası pik həddə çatacaq (K-indeksi 5).

• 13 avqust: G2 səviyyəli güclü maqnit fırtınası gözlənilir. Bu, ən riskli gündür və sağlamlığa xüsusi diqqət tələb olunur.

• 14 avqust: Aktivlik zəifləyəcək, lakin orta səviyyəli maqnetik dalğalanmalar (K-indeksi 4) davam edəcək.

• 15 avqust: Maqnetosfer sakitləşəcək, yalnız zəif lokal fırtınalar (K-indeksi 3) müşahidə ediləcək.

Maqnit fırtınaları Günəşdəki güclü alovlanmalar nəticəsində yaranır. Alovlanma zamanı kosmosa atılan yüksək enerjili zərrəciklər bir neçə gün ərzində Yerə çataraq maqnetosferlə qarşılıqlı təsirə girir və planetin maqnit sahəsində dəyişikliklər yaradır.

Əksər insanlar bu təsirləri hiss etməsə də, hava həssaslığı olanlar, ürək-damar xəstəliklərindən və ya sinir sistemi pozğunluqlarından əziyyət çəkənlər bu dövrdə baş ağrısı, yuxusuzluq, təzyiqin dəyişməsi və yorğunluq kimi əlamətlərlə qarşılaşa bilərlər.