“Natiq Qasımovun irsi ilə Zəfərə” adlı intellektual bilik yarışı keçirilib

Aprelin 11-də Mingəçevir şəhərində yerləşən Natiq Qasımov adına 4 nömrəli tam orta ümumtəhsil məktəbində IX-XI sinif şagirdləri arasında keçirilən

təkcə bilik yoxlaması deyildi – bu, həm də şagirdlərin milli ruhda tərbiyəsi və ideoloji maarifləndirmənin canlı nümunəsi idi.

Təhsil və milli ideya – biri digərindən ayrı deyil

2024-cü ildə Azərbaycan Respublikası Prezidentinin sərəncamı ilə Natiq Səlim oğlu Qasımova ölümündən sonra “Azərbaycanın Milli Qəhrəmanı” adı verilib. Elə həmin ildən etibarən onun təhsil aldığı məktəb – Mingəçevir şəhər 4 nömrəli tam orta ümumtəhsil məktəbi onun adını daşıyır. Bu ad, sadəcə bir lövhədə yazılmış şəxsiyyət deyil – bu ad artıq məktəbin, şagirdlərin və Mingəçevirin ruhunda yaşayır.

Tədbirin əsas məqsədi şagirdlər arasında milli kimlik hissinin gücləndirilməsi, vətənpərvərlik ideyalarının aşılanması və Azərbaycanın Milli Qəhrəmanı Natiq Qasımovun döyüş irsinin gələcək nəsillərə ötürülməsi olub.

Yarış Azərbaycan Respublikasının Dövlət Himninin səsləndirilməsi ilə açılıb. Ardınca Ümummilli Lider Heydər Əliyevin və Vətən uğrunda şəhid olan qəhrəmanlarımızın xatirəsi bir dəqiqəlik sükutla anılıb.

Açılış mərasimində Mingəçevir şəhəri üzrə təhsil sektorunun müdiri Sevinc Həsənova çıxış edərək tədbirin mahiyyətinə toxunub. O, qeyd edib ki, bu kimi yarışlar şagirdlərə yalnız bilik vermir, onların şəxsiyyətinin formalaşmasında, milli düşüncə sisteminin möhkəmlənməsində və vətənə bağlılıq hissinin dərinləşməsində mühüm rol oynayır:

Təhsildə-İdeoliji maarifləndirmənin əhəmiyyəti

“Təhsil sistemində təkcə elmi biliklər vermək kifayət deyil. Bu gün gənc nəsil, xüsusilə şagirdlər milli ruhda yetişdirilməli, vətənə bağlılığı düşüncə səviyyəsində dərk etməlidirlər. Biz belə tədbirlərlə onlara yalnız sualların cavabını yox, həm də kim olduqlarını, nəyi qoruduqlarını, nə uğrunda yaşamalı olduqlarını xatırladırıq. Natiq Qasımov kimi qəhrəmanların irsi bizə yalnız tarix deyil, həm də gələcək üçün yol xəritəsi verir.”

Qəhrəmanın xatirəsi – canlı idealdır

Tədbirdə Milli Qəhrəman Natiq Qasımovun qardaşı Nofəl Qasımov da iştirak edərək qardaşının keçdiyi şərəfli döyüş yolundan söz açıb. O, gənclərə müraciətlə bildirib:

“Natiq təkcə ailəmizin deyil, Azərbaycanın oğludur. Onun həyat yolu göstərdi ki, vətənə bağlılıq sözlə deyil, əməllə sübut olunur. Gənclər bu dəyərləri öyrəndikcə, biz əmin oluruq ki, Natiqin adı, ruhu və irsi yaşamağa davam edəcək.”

Zəfərə aparan yarış – bilik və düşüncə ilə

Yarışın gedişi maraq doğuran və yüksək səviyyədə gərgin rəqabət şəraitində keçib. Suallar yalnız faktoloji bilikləri deyil, məntiqi düşünmə, analitik yanaşma və komanda əməkdaşlığı bacarıqlarını da tələb edib. Sonda Mingəçevir şəhəri təbiət-riyaziyyat və humanitar elmlər təmayüllü liseyin komandası birinci yerə, 18 nömrəli tam orta məktəbin komandası ikinci yerə, 19 nömrəli tam orta məktəbin komandası isə üçüncü yerə layiq görülüb.

Qaliblər diplom, kubok və sertifikatlarla təltif edilib. Amma bu tədbirin əsl qalibi – gənc nəslin yaddaşında qazandığı milli ideallar olub.

Gələcək şəxsiyyətlər formalaşır

Bu cür tədbirlər təkcə bilik yoxlaması deyil, tarixin canlı ötürülməsi, dəyərlərin nəsillərarası ötürülməsi, və təhsilin milli ideologiya ilə inteqrasiyasıdır. “Natiq Qasımovun irsi ilə Zəfərə” adlı bu bilik yarışı sübut etdi ki, maarifləndirmə təkcə dərs kitablarında yox, real həyat nümunələri ilə də aparılmalıdır.

Bu yol Natiq Qasımov kimi qəhrəmanların irsi ilə başlayır, şagirdlərin ürəyində cücərir, və sabahın vətəndaşlarında bar verir.